هذيكة العادة يا سعادة

بعد الدورة و الشيخة إلي عملتها في عرس أختي. جا الوقت بش نكسر سقيا في الإستدعاء لولد خالي. أيا سيدك بن سيدك جاتني بنت خالي الستة و نص متع العشية" أمانعيش أختي ها معايا بش نستدعاو للخطبة. آش بش نمللها فرخة صغيرة و ما تعرفش البلاد. نولي كالناس الملاح نبدل حوايجي و ناخو الليستة متع العباد و بدينا ندوروو نهتريو
بنت خالي: تعرف أحنا نهار الخطبةعنا باااارشة خدمة، بش نقومو نخملو الدار و بد خالاتي بش يجيو يزينو الشوار مع أمي و أا بش نمشي مع بابا لبنزرت نشري الحوايجو بعد نوح ندوش و نلبس حواييو يجيو الرجال يهزو الدبش و بعدكي يتلمو الناء نمشيو لدار العروسة و نقعدو حتى نحنيولها و بعد نروحو نرقدو
أنا: (في قلبي كون سألك على نومرو كلاسطك نقصد صباطك) أنا الساع كانعشنا و حيانا ربي بش نبات فايقة كالعادة والصباح نقوم السبعة نقعد فالحانوت نخدم على روحي وبعد تجي القايلة نطلع بحذا صاحبتي هيام كان خلاوني مكانش ندوش و نعمل سويعتين نوم و بعد نرجع للحانوت حتى تتلم النساء تا نبدل حوايجي و نمشي معاكم ادار العروسة و نقعد إلي كتب و نروح تعرف إلي السهرات هاذي مش جوي نقعد قدام الأورديناتور و لا التلفزة و سهرة كالعادة للصباح
و بين الحديث التافه هاذا و صلنا للدار الأولى دقدقنا طلعلنا ولد المرا
أنا: أمك لهنا؟
الولد: أهأه، أمي خرجت هيا و خالتي
أنا: ميساليش، أحفظ في مخك و قوللها قالتلك خالت سوعاد أهوكا بش تتفضل بحذانا إنت و بناتك النهار الفلاني في الليل لسهرة ولدي. حفضت في مخكا؟
الولد: آي تو كي تجي مالعرس تانقوللها
أنا: صحيت عيش ولدي نحبك ديما حافظ درسك و رد بالك تنسى. أيا باي باي
و كملنا ثنيتنا للدار الثانية
بنت خالي: شنوابش تلبس إنت فالسهرة؟
أنا (والغزول ياكل فيا، عملتي و عملتها بيديا): و الله مزلت مانعرفش، ماو كالعدة يا سروال و مريول طويل و لا كالحوايج الفيوليه، و إنت شبش تعمل شعرك؟
بنت خالي: و الله مانيش ماشية للحجامة بش ندوش و نعمل شعري عكسة و بعد تو نشدو 'كو دو شوبال
كي ها قتلي بش نعملو عكسة طحت نضحك بيني و بين روحي و نقو في قلبي: يا ناري عليك يا بقرة، خوك واحد و بش يعرس مرة و حدة في عوض تفيشط بش تعمل عكسة؟ ماكنتش نتصورك متخلفة لها الدرجة
و هكاكة و صلنا لدار المطلوبة مالقيناش المرا في الدار و أحنا تعبنا باالمشي. غزرت للخردة إلي معايا و قلتلها: أحنا وصلنا وصلنا، برا نتعداو لهيام وفرد مرة نسلم على تاتا فتحية و عم نجيب و نرتاحو حذاها شوية. و ما كانتش مالعاكسين. مشينا قعدنا بحذاها ربيع ساعة بردنا فيها رياقنا واسترجعنا نفسنا و قمنابش نشوفو المرا و جارتها روحوش يا خي طلعت النتيجة ' نيقاتيف' ياخي هزينا رواحنا و مشنا لدار عمتي فاطمة. حكمت علينا ما نخرجو من دارها كان ما نشربو كويس عصير. ما كملت كالكويس كان ما طلعت روحي. الحاصل كملنا استدعينا الجماعة و رجعنا للنساء إلي ما لقيناهمش ف الدا ياخي لقينا حفلة البلدية متعنا، اليوم ولا عمرها نص قرن الحاسيلو قعدنا نتفرجو فالإستعراض إلي أغلب الحركات متاعو غالطة و بعد كملنا ثنيتنا لدار المرا هيا لقيناها ماجاتش أما لقينا جارتها إلي استدعيناها زادة و وصيناها بش تقول لجارتها كي تروح. و شدينا طريق الكياس بش نمشيو لدار خالي اسماعيل. برا سدي بن سيدك عرضتنا باتيسوري في الثنية، الطفلة تذكرت البيتزا و الباتيه و قتلك تو تشريلي بيتزا. يا ربي هالهم إلي هبط على راسي و كمل أحنا ما يخدموش البيتزا فالبلاد و البيتزاريا الوحيدة إلي تخدم باتيه خليناها ورانا، و ليت قلتلها أصبر نكملو دورتنا و بعد نرعو للباتيسوري خوذ حاجة حلوة ولا هاو الحوانيت برشا تنشريلك'جرفاه' و كان إنتي تحب عالباتيه أتا نعطيك الفلوس و أرجع وين الإستعراض خاطر البيتزارية فم، إشري و أرجع، ياخي ولات سكرت فمها و خذات واحد 'ليون" الحلوفة ما يعجبها كان الغالي، كتتني في 600 فالخطبة برك، ملا قداش بش تنحيلي فالإستدعاوات متع العرس؟ الحاسيلو روحت مكوخرة و الصباط كسرلي ساقية و عملت دوش قمقوم فالعرق و واحد آخر فالبانو و ما تتصوروش قداش شاهية تبحيرة: عادت حليمة إلي عادتها القديمة ولا كيما تقول العزوزة: هذيكة العادة يا سعادة